Abambejja n’Abalangira ng’abasinga bava mu Ssekabaka Daudi Chwa era balumiriza nti gavumenti bwe yali ezzaawo Obwakabaka mu 1993 teyasooka kuzzaawo Lukiiko lwa Buganda mu mateeka ekiteeka mu lusuubo Kabaka wa Buganda mu kiseera kino.

“Newankubadde enyingo nnamba 246 eya ssemateeka wa 1995 ekkiriza okuzzaawo omukulembeze ow’ensikirano nga bwe kirambikiddwa mu katundu 247 (1) n’enyingo 118 (1)kiteekeddwa okumanyika nti etteeka lya 1962 akatundu nnamba 1(2) ne (2)omukulembeze gwe koogerako y’oyo alina olukiiko lwa Buganda olulondeddwa mu mateeka ng’ate ow’engeri eno Buganda si gwerina kati” bw’etyo empaaba yaabwe bw’esoma mu bitundu.

Abalangira Daudi Simbwa Chwa ne banne Edith Naalinya, Kiyumba Nabweteme Chwa ne Katikkiro wa Namasole w’e Lukuli, Sulaiman Mamuli Ssebyatika bwe bawaabidde Ssaabawolereza wa gavumenti, Peter Nyombi mu kkooti etaputa ssemateeka nga baagala gavumenti erongoose bye bayise obulemu obuliwo. Bayise mu puliida waabwe Ssebyatika Sulaiman Mamuli .

Mu mpaaba yaabwe ku musango nnamba 50/2010 gwe baatutte mu kkooti nga June 13, 2011 baagala gavumenti erambulule ettaka lye bagamba nti lyali lya kitaabwe Ssekabaka Daudi Chwa ng’omuntu libaddizibwe oba okuliyirirwa kubanga ye yaliddiza Kabaka Mutebi ne Mmengo ng’ekimanyidde ddala nti lyali liteekeddwa kuddizibwa bannannyiniryo.

Ensonda mu ofiisi ya Nyombi zaategeezezza nti baategedde dda ku musango guno nga kati balinze kkooti kubayita balabe engeri gye bagwangangamu.

Kyokka abawaabi baategeezezza kkooti nti baagala Kabaka yennyini alabikeko mu kkooti mu buntu omusango bwe gunaabeera gutandise nti kubanga ebimu ku bikulu ebigulimu bimukwatako butereevu okusinga okukikirirwa abantu abalala nga bwe gubadde gutera okuba mu misango egizze gimuwaabirwa.

Abawaabi era baagala kkooti ekake ofiisi ya kaminsona w’ebyettaka mu ggwanga okukkiriza okussa envumbo ku ttaka lye basuubira nti ly’erimu kweryo eryaddizibwa Kabaka ne Mmengo mu bukyamu okuli yiika 350 n’ennyanja ya Kabaka nti kubanga gye buvuddeko yabagobeza okusaba kwabwe ku by’envumbo ekikontana n’enyingo ya Ssemateeka nnamba 21.

Ennaku zino Kift yafunayo omusajja amuganza era Jason olwakitegedde n’amulumba. Olwayingidde mu nju n’atandika okwasa ebintu by’omu nju era Kift bwe yagezezzaako okumutangira kwe kumukasuka ebweru.

Maama wa Kift yakubidde poliisi eyayanguye okutuuka, Jason ne bamukwata era kati atemeza mabega wa mitayimbwa.

Ekibinja ky’abasawo okuva mu ggombolola ya Kampala Central abaakulembeddwa, Mohammed Kirumira baakedde ne baggala ekizimbe ekiri mu poloti nnamba 09 ekya Sudhir. Ekizimbe kino kisingako abakyala abafumba emmere. Ekifo kino baakikazaako lya Kimese olw’obujama n’emmese ennyingi eziri mu kifo kino.

Akulira ebyobulamu mu Disitulikiti ya Kampala, John Lule yagambye nti baalagira dda abakolera mu kifo kino okukivaamu bapangise ku bizimbe ebirala naye ne bagaana.

“Tebalina kaabuyonjo mwe bagenda, bamala gayiwa amazzi amajama buli wamu, ekiyumba kino kikadde era kyamerako emiti, tekikyasaanira kukoleramu bantu wadde okubeera mu kibuga,” Lule bwe yagambye.

Wabula abakyala abakoleramu baalaajanye nti bo bannamwandu abatalina buyambi na ssente zimala kupangisa mu bizimbe bipya.

“Tusaba mutwongere obudde tukole nga bwe tulongoosa ekifo kino tusobole okukola ssente tugende mu bizimbe ebirala,” Rehema Namubiru bwe yagambye.

Ekizimbe kino kyamerako omuddo waggulu, kisigaddeko abasuubuzi b’amaduuka batono ate waggulu amabaati agasinga gaayonooneka.

Ate n’ekizimbe ekisangibwa ku poloti 13 ku luguudo lw’e Ntebe ekitunudde mu kizimbe kya Mutaasa ekipya nakyo bakiggadde.

“Mukome leero okukola. Embeera y’obulamu ku kizimbe kino mbi. Temulina kaabuyonjo, ekizimbe kikadde nnyo ate kiyitiridde obujama,” Mohammed Kirumira bwe yagambye.

Abakyala abafumbi b’emmere bamwegayiridde nti asooke abawe obudde bayonje ekifo kyabwe bategeeze ne nnannyini kyo n’agaana. Oluvannyuma yabawadde olunaku lumu okutunda emmere gye baabadde bafumbye.

Akulira aba wooteeri mu kifo kino Fatuma Kaggwa yeegayiridde abasawo nti babawe obudde ba longoose embeera.
Yakkirizza nti kituufu ekizimbe kikadde nnyo n’embeera y’obulamu mbi naye bagenda kugirongoosa.

“Twamwegayirira n’atupangisa ku kizimbe kino wadde kaabuyonjo zaayonooneka naye byonna tugenda kubitereeza mutuwe obudde,’ Fatuma Kaggwa bwe yagambye.

Kino abasawo baakigaanye ne bategeeza nti babawadde obudde obumala okutereeza ekizimbe kino naye tekikolebwa kati basazeewo bakiggale kubanga kisukkiridde n’obukadde.

Amyuka omutendesi wa Cranes, Jackson Mayanja agambye nti ttiimu gy’atutte e Morocco okuzannya mu mpaka za LG Four Nation Cup tegenze kulambula wabula kuvuganya.
“Abazannyi be tugenze nabo naddala abateebi kye bakola bakyagala nga buli omu ayagala kulaga nti singa aweebwa obudde, asobola okumalawo obuzibu bwa Cranes,” Mayanja bwe yategeezezza.
Cranes yasitudde kiro kya leero mu nnyonyi ya Turkish Airways okwolekera ekibuga Cassabalanca empaka gye zitegekeddwa.
Mayanja agamba nti baagala kunaazaako Bannayuganda amaziga ga Kenya era kino kye kigenda okubawa amaanyi okufutiza buli abasala mu maaso.

Abaagenze: D. Onyango, A. Dhaira, S. Masaba, G. Walusimbi, H. Kavuma, H. Kalungi, A. Alishe, M. Mudde, T. Mawejje, V. Kayizzi, M. Mutyaba, E. Okwi, H. Kiiza, R. Sentongo ne P. Ochan.
Bano baakwegattibwako B. Umony, I. Isinde, M. Serumaga, H. Wasswa ne M. Oloya n’omutendesi Bobby Williamson.

Kino kikoleddwa omulamuzi wa kkooti enkulu Eldad Mwangushya oluvannyuma lw’akulira ekibuga Jennifer Musisi okuwandiikira kkooti ng’agitegeeza nti okulwawo kw’omusango kigenda kufiiriza KCCA ssente kubanga abamu ku baddereeva tebasasula.

Omusango gwaseeseetuddwa ku Lwokutaano lwa wiiki ewedde. Kino we kijjidde nga Loodi meeya wa Kampala Erias Lukwago afulumizza ekiwandiiko ekigaana baddereeva okusasula ssente mu UTODA. Yasinzidde Mecca gye yagenda ku Hijja n’afulumya ekiwandiiko ng’agamba: “UTODA yatwala KCCA mu kkooti ng’egivunaana okwagala okusazaamu ttenda yaayo, kino kitegeeza nti ekiseera kino terina ttenda era UTODA tekkirizibwa kusolooza ssente okuggyako ng’omusango guwuliddwa” ebbaluwa bw’egamba.

Kyokka ekiwandiiko kkooti kye yawa UTODA kiragira KCCA okuyimiriza okusazaamu ttenda ya UTODA okutuusa ng’omusango guwuliddwa era KCCA tekkirizibwa wadde okweddiza paaka zaayo okusoloozaamu ssente.

Kino KCCA yakikkiriza ng’egamba nti bo kitongole kya gavumenti ekigendera ku mateeka era ekiseera kino UTODA yekkirizibwa okusolooza ssente mu baddereeva bonna era abajeemera okubawa ssente aba amenye mateeka avunaanibwa.

Wabula baddereeva abawakanya enkola ya UTODA mu kibiina kyabwe ekya DACCA, baagamba nti tebagenda kuddamu kusasula UTODA ssente kubanga ttenda yaabwe yagwaako nga October 31.

Oluvannyuma lwa kkooti okuwa UTODA ekiragiro, abamu ku baddereeva baakubagana n’abakozi ba UTODA omusaayi ne guyiika nga balwanira ssente ezigambibwa nti zibasoloozebwaako aba UTODA ate ng’endagaano yaabwe yaggwaako dda.